المطره بالشام / كتب الشاعر / بسام العكش

المطره بالشام

تنشنش قلبي لما اسمعت 
صوت المطره بحارتنا 
تمنيتا من قلب ورب 
 يديما وتكبر نعمتنا

شو حلوه المطره بالشام 
وشو حلوه معها الأيام 
اوقاتا ولا بالاحلام 

 خير وبركة لديرتنا

تشوف العالم فرحانه 
حوالين بعضا دفيانه 
هموما وحزنا نسيانه 
 تدعي لربا خالقنا

مطرتنا متل المرمر 
حبه حبه تتمختر 
ريحتها مسك وعنبر 
 زخاتا ما تفارقنا

قرب شوفا من العالي 
من قاسيونا هالغالي 
وعبردى حباتا تلالي 
 تحاكي نسمة غوطتنا

بالحاره امشي شويه 
تحت المطره الهنيه 
وشم الريحه الذكيه 
 ريحة ديارا انستنا

واللمه الحلوه تهنينا 
والمنقل نارو تدفينا 
وأمي بقصصها تحاكينا 
 ومعها يتحلى سهرتنا

يا مطره زخي زخي 
وبخيرك عبلدنا رخي 
ودوري عالشام ولفي 
 والله يديمك مطرتنا

بسام العكش