عيد الشام / الشاعر / بسام العكش

عيد الشام

الله على أيام زمان 
صارت كان ياما كان 
كيف كنا للصبح نسهر 
بليالي العيد بأرض الشام 

نصحى من الصبح بكير 
قبل صوت العصافير
نصحى ونحنا فرحانين 
وضحكاتنا تنسم انسام 

نعايد على أمنا وابونا 
نبوس أيادي اللي ربونا 
يلي بقلوبن حطونا 
حتى نربى وما ننضام 

كنا بالعيد نسرح 
نلعب ونضحك ونفرح 
لا هم ولا حزن يجرح 
أمن ومحبة عزه وسلام 

بذكر المرجوحه بحارتنا
وفول النابت اكلتنا 
والبسمه بطفل جيرتنا 
اديش حلوه هالايام 

كنا نمشي وبمشيتنا ......نميل نتمختر 
وبايدنا الملبس..... والقضامه على سكر
وعلى تهليلة العيد......... نردد الله أكبر 
ونسمع أحلى وأطيب أنغام 

والروحه عالحميديه 
وبكداش والبوظه الهنيه 
فكتوريا وجنينة المنشية 
وضفافك بردى ويا سلام

عالاموي كيف كنا نروح 
واحلى سهره عالاسطوح 
نحكي وباسرارنا نبوح 
ومع الحبايب يحلى الكلام

من غربتي للشام بنادي 
بدعيلا وقلبي راضي 
يحفظها ربي الهادي 
وانشالله عمرا ما بتنضام 

بسام العكش

شارك الموضوع

شاهد أيضا

منشورة في: الشعر العامي