حكواتي الشام / بقلم الشاعر / بسام العكش

حكواتي الشام

ناره ناره وكاسة شاي
بسرعه وصل للقبضاي
وما تنسى عمك صياح
لبي طلبو وقلو جاي

القهوه بيحبا تقيله
وراسا عجمي الأركيله
يالله عجل أبو رياح

ما عاد بإيدي حيله

على جنبك كأس زهورات
وشق شويه عالفحمات
ووقفوا الضجه يا زاوات
اجا دورا الحكايات
وصل عمنا الحكواتي
وبوجودو بتحلى الليله

وهون بلش الحكواتي بقصة عنتر.....

قال الراوي عالمنبر
قصة هالعبد الأسمر
أبو الفوارس عنتر
معرم صدرو ويتمختر

حامل سيفو هالصمصام
وراكب على فرسو الأبجر

طالع سيفو من غمدو
وحصانو رسنو شدو
وصوتو بيهز جبال
شهم وما حدا قدو

وبسرعة بين عماره
جايه من كتف الحاره
يحكي قصصه بالأدغال
ويتحدى كل الداره
وتشهدلوا كل رجالو
عن طلعاتو المغواره

وبعينو شافو عنتر
عم يتمنفخ ويتأمبر
ونفخه وحده من تمو
عماره عالأرض تبحتر

عماره حميتلو رجالو 
ولاد عمو وخوالو
وبلش عنتر قطع الروس
وكلن هربو قدامو

ولملم عماره جرحو
وتخبا ورا ترسو
وصار فرجه بين الناس
والمصيبه صارت أكبر

وإنشاء الله بنكمل الجزء الثاني لو حبيتو 

بسام العكش